Bordi

Në përbërje të Bordit të Etikës janë personalitete në fushën e gazetarisë, jurispudencës dhe shoqërisë civile të njohur për integritet profesional të cilët  garantojnë pavarësi të gjykimit. Bordi është përzgjedhur me propozim të anëtarëve të Aleancës, Këshillit Shqiptar të Medias si dhe Departamentit të Gazetarisë në Universitetin e Tiranës. Pesë anëtarët e miratuar janë: Dorian Matlija, jurist, Mark Marku, pedagog nga Departamenti i Gazetarisë dhe ekspert i etikës, Klodiana Kapo nga Faktoje.al,   Lorin Kadiu nga Citizens-Channel si dhe Enton Abilekaj nga Dosja.al.

Klodiana Kapo

Anëtare e Bordit të Etikës, Drejtore Ekzekutive e Qendrës Faktoje.

Klodiana Kapo i është bashkuar skuadrës së “Faktoje” në pozicionin e Drejtoreshës Ekzekutive. Ajo vjen në këtë pozicion pas një eksperience trevjeçare si Menaxhere e Marrëdhënieve me Publikun dhe Komunikimin në Organizatën Ndërkombëtare për fëmijë World Vision, ku së fundmi u vlerësuar nga zyra Globale, me çmimin “Global Brand Award”.

 Klodiana vjen në “Faktoje” pas një karriere 16 vjeçare në mediat më të njohura në vend ku ka raportuar kryesisht çështjet sociale e më konkretisht edukimin dhe sistemin arsimor, shëndetësinë, zhvillimin e rinisë, etj. Në karrierën e saj,  ka punuar si gazetare në Top Channel (ku numëron dhjetëra dokumentarë dhe histori personale), ka pasur rubrikën e saj të përjavshme në gazetën “Shqip”, dhe ka punuar si kryeredaktore në Televizionin Publik Shqiptar.
Klodiana numëron ndërkohë edhe një sërë fushatash të suksesshme ndërgjegjësimi për organizata jo qeveritare lokale dhe ndërkombëtare, si dhe është bashkautore në dy libra.

Prof. Assoc. Mark Marku

Kryetar i Bordit të Etikës, publicist i njohur dhe pedagog.

Mark Marku është përgjegjës në Departamentin e Gazetarisë dhe Komunikimit, Fakulteti i Historisë dhe Filologjisë, UT. Është autor i një numri të madh shkrimesh. Mark Marku ka qenë deputet i Kuvendit të Shqipërisë.

Av. Dorian Matlija

Anëtar i Bordit të Etikës, Drejtor ekzekutiv, Qendra Respublika.

Dorian Matlija është diplomuar me titullin Jurist në vitin 1999, në Fakultetin e Drejtësisë pranë Universitetit të Tiranës. Aktualisht është Drejtor Ekzekutiv i qendrës Res Publica ku më parë ka qenë dhe zv. Drejtor. Doriani ka shërbyer më parë si avokat në studio ligjore “Matlija” ndërsa në fillimet e karrierës së tij ka qenë jursit dhe më pas Drejtor i Drejtorisë juridike në Radiotelevizionin Shqiptar (2002-2005).

Lorin Kadiu

Anëtar i Bordit të Etikës, Drejtor ekzekutiv i Qendrës Citizens Channel.

Lorin Kadiu ka kryer studimet bachelor në Gazetari dhe Komunikim dhe ka një master shkencor (MSc) për Marrëdhënie me Publikun në Universitetin e Tiranës. Prej vitesh është angazhuar pranë një sëre mediash lokale dhe ndërkombëtare si gazetar, redaktor dhe trajnues në metodat inovative të gazetarisë. Aktualisht është Drejtor Ekzekutiv i Qendrës Citizens Channel.

Enton Abilekaj

Anëtar i Bordit të Etikës, Drejtor ekzekutiv, Dosja.al.

 Enton Abilekaj ka një eksperiencë të gjatë si në median e shkruar edhe në atë vizive. Ai e ka nisur punën në mesin e viteve ’90 në gazetat më në zë të kohës, ndërsa në vitin 1998 në moshën 23 vjeçare, mori drejtimin e informacionit të Televizionit Publik Shqiptar. Entoni më pas ka drejtuar gazetën “Koha Jonë” deri në vitin 2004. Në vitin 2005-2009,  ka drejtuar informacionin në TV Alsat dhe nga viti 2011 deri në 2016-ën, drejtoi televizionin News24. Në vitin 2017, u emërua Drejtor Informacioni në televizionin Ora News. Aktualisht është Drejtor Ekzekutiv i Dosja.al.